12/5/10

شو بتختار لما تكون حياتك عالمحك؟


مبارح رحت مراجعه عالمستشفى 
مراجعه اعتيادية - اتأخرت الدكتورة لتجي 
وقعدت انتظرها بهالوقت - باللوبي تبع المستشفى كان الوقت عم يمر ببطء شديد - كنت عم حس بضيق شديد 
كل شوي يمر من قدامي حدا يعاني من مشكلة اصعب من التاني 
كله كان عادي إلى ان شفت وحدة الله يتلطف فينا كانت قاعدة على كرسي متحرك تدفعها قريبتها - كانت منظرها عجيب - ماعم يروح من بالي أبداً 

واضح انها كانت تعاني من شلل أو شيء من هذا القبيل 
وجهها عبارة عن عظام مكسوة ببعض الجلد الرقيق من شدة النحف 
متشنجة وعيونها تشخص الى فوق ويدها متيبسة بشكل مخيف الى جانب وجهها وراسها مثنى بشكل غريب 

أول ما شفت هالانسانه بصراحة خفت 
وقلت بقلبي يالطيف الطف - الحمدلله الذي عافاني مما ابتلاها به وفضلني على كثير ممن خلق تفضيلا كثيرا

أكيد اني ما خفت من شكلها ولكن خفت اني فكرت أنه هي انسانه مثلها مثلي - يعني ممكن يصيبني نفسي الشي أو شي أسوأ منها باي لحظة - حتى بدون سابق إنذار 
وهالشي استوقفني فجأة وكان مثل صدمة إلي 

انه ياترى شو عملت لكبرتي 
شو عندي رصيد اشياء ممكن استخدمها لما اكبر واحتاج الناس تساعدني - سواء من مرض أو ضعف أو اي نوع من البلاء اللي بيصيب الكبار بالسن 

حياتي كلها إلى اليوم كانت عبارة عن طقطقة على الكمبيوتر زائد شغل بالبيت واهتمام بالاسرة زائد بعض الحسنات والاعمال اللي قصدت فيها وجه ربي اللي لو جمعتها كلها ما بتساوي شي قدام منظر هالمرأة اللي شفته يالطيف الطف بنا يارب بالاضافة طبعا لكتير من المشاكل اللي صارت بيني وبين الناس وكتير من الابتلاءات اللي اتجاوزت بعضها وفشلت قدام بعضها الاخر 


ياترى لو صار وكانت حياتي على المحك 
وجمعت كل اعمالي وكانت في الميزان مقابل العافية اللي عطاني ياها وحرمها لهالانسانه 

ياترى كنت رح وافق فورا وقول المهم اني ابقى بعافيتي 
ولا رح قول لا لازم اني عيش ببيت كبير ولا اركب سياره فخمة ولا فستان يذهل الجميع ولا ولا ولا .......

يا ترى لو اني خيرت ان تستبدل كل اعمالى الخيرة مقابل العافية أو مقابل انه امرض بس كون بالاخرة من اهل الجنة ياترى هل حيكون عندي القوة اني اختار الجنة مهما كان نوع المرض اللي حيصيبني ومهما كانت شدته 

واستمرت الاسئلة من فكرة لفكرة 
النتيجة اللي قدرت اوصلها بالنهاية انه الحمدلله اللي اعطانا الصحة بدون مقابل وما طلب مننا الا الشكر عليها واستخدامها بشي ما يغضبه 

وفهمت عنجد شو معنى اني كون تحت ألطاف الله 
واني كون مستورة بستر ربي سبحانه 
قبل ما أنهي بتمنى منكم تشوفو هالفيديو لتقدروا تحسوا باللي عم احكي عنه 


بتمنى لجميع أحبابي الستر والعافية 
ولا اسمح بنسخ الموضوع دون ذكر المصدر
رولا

People who read this post also read :




Share/Bookmark

No comments:

Post a Comment